Gizarte matxista aldatzeko

EHZ jaialdiko Brigada Ubelak Puntu Ubela antolatu du aurtengo. Lekorneko besta gunean eraso bat jasan duten pertsonen errezibi lekua izanen da, baina ere feminismoaz eztabaidatzeko uztailaren 1, 2 eta 3an. Laguntzaileen artean ere zabaldu nahi da jarrera sexisten kontrako ardura.

Iturria: Iñaki Etxeleku - Ipar Euskal Herriko Hitza

Puntu edo Gune Ubela deitu duen eremu bat izanen du espresa Euskal Herria Zuzenean jaialdiak, bestaren ondo-ondoan. EHZko Brigada Ubelak antolatu du. Eraso sexista bat, edo berdin arrazakeria, homo/transfobia pairatu duen nornahiren errezibitzeko xokoa izanen da. Baita ere eztabaidatzeko, formatzeko, irakurri eta tailerren segitzeko.

Badu hiru urte lanean hasia dela Brigada Ubela, eta feminismoaren gaiari indar gero eta handiagoa ematen dio jaialdian. Aurten, eraso sexisten kontrako protokoloari akuilu handiagoa emanen dio, EHZko laguntzaile guzien artera heda dadin barrandari lana. Oihana Otegi Brigada Ubelako kideak esplikatu du zertarako egina den protokoloa: “Bereziki orain arte eman zaio indarra eraso sexisten inguruko gaiari. Hasteko identifikazio lan bat egin, prebentzioa, eta gero, erantzun bat egiteko”. Iaz, jadanik, bazuen protokoloa Brigada Ubelak eraso bat gertatzen zenerako. Aurten indartu nahi den puntua da, jaialdi denboran izan eraso sexista baten berri jakinik gainera: “Errana izan zaigu, bai. Helburua da kontzientziatzea zein izaten ahal diren eraso sexistak. Izan dira eraso batzuk besteak baino bortitzagoak, baina, bai, identifikatuak izan dira argi eta garbi”.

Aitzineko urtean feminismoaz gogoetatu zen jadanik EHZn. Gizarte ereduaz arrangura duten mugimenduen gisan formakuntza lana egin nahi du: “Nik uste testuinguruari lotua den. Festibala ez da aparteko zerbait. Gizartearen barne da. Arrangura bat da orokorrean, gizarte matxistarena. Ikusiz EHZ alternatiben ikur dela, ekologia edo euskara den bezala, argi ikusi zen feminismoa ere sartu behar zela, eta talde bat sortu”.

Bizkitartean, Brigada Ubelekoek badakite badela laguntzaile guziengana joateko beharra: “Beharko litzateke laguntzaile guzien artean zabaldu. Iaz arte protokoloa afixetan eman zen, baina mezua ez zen hainbeste pasarazi”. Horregatik, aurten arduradun postuetan diren laguntzaileek ere beren gain hartuko dute. “Arduradun guziei galdeginen zaie erran dezaten taldean dituzten laguntzaileei badela protokoloa. Laguntzaile guziek jakinen dute zein den”. Urrunago joateko beharra ikusten du Brigada Ubelak. Laguntzaileen artean ere sexu arteko banaketa ikus baitaiteke egin moldeetan: “Estereotipoak aski markatuak dira; adibidez, teknikan gehienak gizonak dira; sukaldean, gehienbat emazteak. Lagun taldeak dira. Zergatik ez heldu den urteei begira nahasketa gehiago”.

Eraso sexista bat jasan duen edozeinek arabera pentsatu Puntu Ubela izanen du gerizalekua jaialdi denboran. Nolabait sartzen da brigadak marraztu protokoloan. Mota orotako erasoei arta emanen zaie eta eraso sexisten kasuan jarraipen berezirako antolakuntza plantan emanen da. “Eraso sexista bat jasaten badu norbaitek, etortzen bazaizu salatzera, lehen gauza da entzutea. Bere hitza ez duzu inoiz zalantzan eman behar; azken finean, pertsona hori larrialdi egoera batean sentitzen da, eta konfiantza eman behar zaio. Brigada Ubelekoak abisatu: edozein laguntzailek, edo biktimak berak —telefono zenbaki bat emanen dugu—. Beharra sentitzen badu, pertsona hori Gune Ubelera laguntzea”. Horregatik, munta du laguntzaile oro jakinean izateak, ez dadin erasorik pasatzera utz.

Sekula eraso baten salaketa agertuko balitz, protokoloak erantzunak ere aitzinikusten ditu jazarpena jasan duenarekin adosturik. “Zer eraso izan den, horren arabera. Larritasunaren arabera hartuko da erabakia erasotzailea kanporatzeko edo beste. Pentsatua da ere festibaleko memento azkar batean eszena gainera igotzea festibaleko arduradunak eta Brigada Ubelekoak. Biktimaren nahia baldin bada noski”.

Ostirala Egun Ubela izendatu dute, eta, Sukaldetik plazara dokumentalaren inguruko solasaldiaz gain, Ferekatze tailer bat eginen dute. Gasteizko Unibertsitateko Emakume Taldearekin antolatu ateleria da: “Ongi sentitzeko eta goxotasun tailerra da”.

Iaz bezala, Point 8 taldeko artistekin apaindura landuko da. Buruetako eskemen inarrosteko, itsasgarriak sortuko dituzte umorezko erranaldiekin, nahi duenak soinean eraman dezan.

Soa aldatu

Dutxak hezkuntza leku izan daitezke EHZn. Publikoaren kanpalekuan bi dutxa andana dira, bereiziak direnak. Nehork deus erran gabe antolatzaileek ikusten dute jendeak bere baitarik deliberatzen duela bata neskentzat izanen dela eta bestea mutikoentzat. Buruetan diren eskemen den mendrena kilikatzeko ideia bat izan dute aurtengo. “Horren hausteko, nahi ditugu bi dutxetan gizon eta emazteen irudiak eman, biluzirik noski. Eta sustut gorputz ezberdinez osatuak: iletsuak, lodiak, meheak, titi lodiak, titi ttipiak, zakil handiak, zakil ttikiak… denetarik. Errealitate bat irudikatzeko, gorputz aniztasuna baloratzeko”.

EZTABAIDA GUNEKO EGITARAUA

OSTIRALA (UZTAILAK 1)

Sukaldetik plazara dokumentala eta hitzaldia.

Ipar Euskal Herriko mugimendu feministaren historia aztertzen du Sukaldetik plazara dokumentalak.

Filmaren ondotik, emazteen borrokaren historiaz eta heldu diren erronkez mintzatzera etorriko dira: Miren Aranguren (Bilgune Feminista); Xane Kreckelbergh (Emazteek Diote); Alaia Berhondo (PAF).

LARUNBATA (UZTAILAK 2)

Kapitalismoa eta osasuna: denak eroak ote gara?

11:00etarik 13:00era: Osasun arloari buruz ezagutzen diren kritika kolektiboetako kideak hor izanen dira, tartean, anti-psikiatria kolektiboak adibidez. Autoeratutako edota komunalki eramandako osasun arloko esperientziak trukatuko dituzte.

Kurdistan, emazteek burujabetzen.

15:00etarik 17:00etara: Ezker kurduak Konfederalismo Demokratikoa hautatu ondotik, nola antolatzen dira gerrillan, arlo politikoan, herri elkarteetan dabiltzan emazteak? Jendarte kurduan feminismoa eta parekidetasuna bultzatzeko zein indar eta bitarteko erabiltzen dituzte, nor dute bidelagun eta etsai?

Hizlariak: Michelle Allison (Kurdistango Kongresu Nazionala); Martxoaren 8aren karietara Frantziatik Kurdistanera joan delegazioko kide bat.

IGANDEA (UZTAILAK 3)

Notre-Dame-des-Landesko ZAD: lurralde eta jendarte burujaberantz.

11:00etarik 13:00era: Kapitalismotik kanpoko bizitza eredu baten hazia da ZADa, elkartasunean eta autokudeaketan. Nola gauzatzen dute bizimodu hori?

Hizlariak: ZADeko biztanle-okupatzaile talde bat.

‘Burujabe, burugabe, burujale’ mahai inguru aktiboa.

17:00etarik 19:00etara: Euskal Herrietan, gaur egun, pertsona eta kolektibo batzuk burujabetzaren alde borrokatzen eta antolatzen ari dira: Kooperatiba eraldatzaileak, Autonomia Komunala eta Lurralde Askea, besteak beste. Esperientzia horietako jendea etorriko da proposatzen eta egiten dutenaren aipatzera eta eztabaidatzera.

ETIKETAK

Elkarbanatu!

AGENDA